A Asociación de Troiteiros “Río Furelos” manifesta a súa satisfacción polo importante convenio que vén de asinar coa Fundación Centro Cinexético e Piscícola de Galicia.

As dúas Asociacións asinantes declaran ter os mesmos intereses na defensa das augas galegas ao tempo que se comprometen a levar a cabo todo tipo de actividades de carácter pedagóxico e instrutivo coa finalidade de promover nos afeccionados á pesca unhas prácticas acaídas co imprescindible coidado dos nosos ríos.

Asinado o día 12 de novembro, o convenio contén dúas cláusulas polas que se establece unha relación de reciprocidade e traballo conxunto. Por este acordo, a Fundación Centro Superior Cinexético e Piscícola de Galicia, comprométese a ceder de maneira gratuíta os seus terreos e instalacións en San Xuán de Tor (Monforte de Lemos) á Asociación de Troiteiros “Río Furelos” que, pola súa parte se compromete a instruír aos seus asociados, tal como o vén facendo dende a súa fundación, en prácticas de pesca e outras actividades beneficiosas co medioambiente, nomeadamente cos nosos ríos. Ademais este acordo comprométenos a trasladar á citada Fundación, de maneira desinteresada, todos os datos e informacións referentes a todo aquilo que teña que ver coas capturas, a súa tipoloxía e todo o referente ás agresións medioambientais detectadas pola nosa Asociación.

O convenio, que foi asinado en Monforte de Lemos polo Director Xerente da Fundación Centro Superior Cinexético e Piscícola de Galicia, Francisco García Bohadilla e polo presidente da Asociación de Troiteiros “Río Furelos” Xavier Pazo Blanco é un pasiño máis nese longo camiño que nos queda por percorrer a prol da recuperación da nosa inmensa riqueza fluvial, tan maltratada e ignorada nas últimas décadas.

+info:

La Voz de Galicia

El Correo Gallego

O libro “Lampreas e Pesqueiras” de Miguel Piñeiro foi presentado no Salón Camilo José Cela do Chef Rivera en Padrón.
Como preámbulo introductorio, proxectouse un vídeo adicado ás pesqueiras, ás artes de pesca e á cultura lampreeira.
Xa no turno de intervencións, tomou a palabra o Director de Galaxia, Víctor Freixanes quen subliñou a experiencia xornalística e investigadora do autor neste campo.
Posteriormente o restaurador Chef Rivera fixo un canto ás excelencias gastronómicas deste singular peixe.
Na súa quenda, o escritor e xornalista madrileño Joaquín España centrouse na especial amizade que mantén desde hai máis de vinte anos con Piñeiro e deu un repaso polas súas vivencias nesta terra á que está tan vencellado.
O catedrático e compañeiro de pesca do autor, Juan José Moralejo, destacou a excelencia técnica e informativa do texto e a beleza e cualidade do material gráfico e fotográfico, ademáis de incidir na falla de saúde que teñen os ríos galegos.
O prestixioso arquitecto César Portela, amigo persoal da familia Piñeiro, destacou o abandono no que están sumidas estas construcións hidráulicas e reparou na fonda amizade que mantivo co pai do autor.
Miguel Piñeiro, como continuación de Portela, fixo un encendido alegato en defensa das Pesqueiras do Ulla para concluir entregando uns sorprendentes agasallos en proba de agradecemento: a César Portela un debuxo do seu pai Agustín do ano 1950, a Chef Rivera unha tarxeta manuscrita do Nobel padronés Camilo José Cela do ano 1983 e a Víctor Freixanes como Presidente da Fundación Otero Pedrayo, unha carta do Patriarca das Letras Galegas do ano 1964. A Moralejo e a España, apalabroulle un salmón en Ximonde para 2009.
Ao acto asistiron un centenar de persoas.

O pasado sábado 15 de novembro, esta asociación celebrou a III SAIDA DE CAMPO na busca de cogomelos na que participaron 20 persoas.

Nesta saida, atopáronse exemplares de 55 especies distintas, que a cargo do experto micólogo, Oscar Lugris, foron identificadas e clasificadas nunha exposición na Praza da Herva, da zona dos viños de Melide, á cal se achegaron os veciños ante a curiosidade destes exemplares de chamativas cores e formas.

Despois dunha charla, na que se falou do xeito correcto de recoller os cogomelos e as precaucións na identificación dos cogomelos comestibles mais comúns, os participantes pasaron a degustar un menú preparado por Xan Pérez consistente en:

1. Revolto de Boletus
2. Boletus con gambas en salsa de tona e castañas
3. Boletus a plancha
4. Revolto de Niscalos e Cantharellus
5. Pinchos Morunos acompañados de Niscalos e Cantharellus
6. “Orgasmo de monte” Sobremesa de mus de chocolate con figos e Cantharellus envolto nunha filloa

Todo este menú foi acompañado con viños de Mencia e Rosal

A xunta directiva agradece a participación e a colaboración prestada.

Asdo. Xan Pérez

A Asociación Micolóxica COGOMELIDE apadriñada pola Asociación de Troiteiros 'Rio Furelos', organiza a III Saída de Campo na procura de cogomelos.

Esta saída terá lugar hoxe día 15 de novembro ás nove da mañán dende a cafetería 'O Burato'.

Os recorrdios faránse por diversos montes da Terra de Melide, acompañados sempre por monitores coñecedores de distintas variedades de cogomelos.

Ás tres do serán no bar 'O Noso Bar' faráse unha charla con clasificación de cogomelos recollidos, a cargo de Oscar Lugrís, e inmediatamente pasarase á preparación dos mesmos por Xan Pérez e degustación para todos os participantes.

Esta Asociación quere expresar o seu agradecemento pola súa colaboración a 'O Noso Bar'.